Tuesday, February 18, 2014

إزاي أشتغل فى الظروف الحالية .. الجزء الثاني ؟!!

إزاي أشتغل فى الظروف الحالية ؟!!

-2-

الـ PASSION :

لو جيت سألتك: هتشتغل إية بعد ما تتخرج؟
ممكن تستغرب وتقول: طبعاً هشتغل فى مجالى، وممكن تزود كلمة -لو لقيت شغل فيه- 
إنما لو سألتك: لية عايز تشتغل فى مجالك لما تتخرج؟
فممكن ساعتها تقول: 
عشان أنا خريج الكلية الفلانية هشتغل في إية يعنى؟ .. أو:  عشان أنا دراستى كانت فى مجال كذا ودة اللى بفهم فيه .. أو: عشان بقالي خمس أو ست سنين بدرس فى المجال دة فأكيد مش بعد دة كله هسيبه واشتغل في أي حتة تاني.

كل الإجابات السابقة تعرف بإسم: الصح بتاع المجتمع!
بمعنى ان : دة اللي إنت شايف الناس بتعمله قدامك .. دة اللي إتقالك عليه إنه صح و رائع كمان - لو قدرت تشتغل فى مجالك - .. لا و كمان دة دليل على إنك كويس يعني مش وحش.

ولكن للأسف كل الإجابات دى برضه بتأهلك بامتياز إنك تقضى ما بقى من عمرك فى إرهاق وتعب و -ضيق-  فقط عشان تقدر تواصل دورة حياتك، و دة لسبب بسيط جداً
كل الحاجت دي .. مش إنت .. 
كل الحاجات دي حاجات إتقالك عليها كويسة، لأننا اتربينا فى مجتمع بيقول إن دائماً اختياراتنا هيا الغلط وهناك دائماً من يعرف الصواب وعلينا أن نسير وراءه بلا تفكير .. دخلت هندسة لية: عشان جبت مجموع كبير فى ثانوية عامة 
طب إنت جبت مجموع كبير لية؟ عشان أدخل هندسة !!
أيوة يعني إنت عايز تدخل هندسة لية؟ عشان أنا أعرف فلان مهندس و شغال فى شركة كبيرة و معاه عربية BMW -مثلاً يعنى :) -؟ 
أيوة، هو بقى كدة، إنما إنت مش شرط خالص تكون كدة، لأن ببساطة إنت دورت على -غيرك- كان كويس فى اية و مشيت وراه
ودة اللي دايماً بنعمله -بنشوف فلان- إزاى ناجح و رائع ومعاه فلوس و ساعتها بنقول لنفسنا الجملة المشهورة - أنا عايز أبقى زيه-
وتبتدى تشوف هوة عمل إية عشان تعمل زيه.
ولو فكرنا شوية فى الجملة دى هنلاقيها غاية فى الخطأ .. عمرك سمعت عن إتنين مشهورين ليهم نفس قصة النجاح؟
طب عمرك سمعت عن واحد مشهور فى حاجة -أحمد زويل مثلاً- وقالك أنا مكنتش بطيق الفيزياء فى الجامعة بس اتخرجت واشتغلت لحد ما بقيت كدة؟
الإجابة هي: لأ، طبعاً

أمال ايه الكلمة المشهورة أووووي اللي كل الناس الناجحين بيقولوها؟ اية القاسم المشترك بين كل الناس دي؟
كنت بحب الفيزياء وانا صغير وكنت كاتب على باب الاوضة الدكتور أحمد ... أحمد زويل (نوبل فى الفيزياء)
كنت بعشق كرة السلة ولما اترفضت من فرق المدرسة بكيت... مايكل جوردون (بطل NBA ست مرات و اغلى لاعب فى NBA )
كان عندي شغف رهيب بالإلكترونيات منذ صغري وقدمت ورقة بأفكارى فى شركة أتاري ATARI مما تسبب فى جعلي أعمل بعدها كمصمم ألعاب ... ستيف جوبز (مؤسس APPLE و PIXAR)

باالظبط .. الشغف PASSION .. والشغف هو الحاجة اللى تخليك شغال 18 ساعة فى اليوم فى الحاجة اللى انت بتحبها بدون الإحساس بال-ضيق-



و اليوم اللى هتبدأ تدور بيه على شغفك، و تبدأ تفكر -إنت- فعلا بتحب اية، و اية أكتر حاجة شايف نفسك فيها -مهما كانت- .. هو اليوم اللى حياتك هتاخد فيه منحنى آخر تماماً، و هتبدأ فعلاً فى قراءه و تنفيذ رسالتك فى الحياة، لأن الله لم يخلق ذلك الشغف والحب فيك عبثاً لتتجاهله و تروح تشتغل فى حتة تانية.
مش معنى كدة ان الدنيا هتبقى وردى و سهلة اول ما تلاقى مجالك بالعكس هتبقى أصعب بمراحل، الفرق الوحيد: انك مش هتفكر امتى الأجازة ولا هتفكر امتى الشغل يخلص، لأنك بالفعل بتحقق ذاتك أثناء الشغل.
ومش معنى كدة برضه انك لازم تغير مجالك، ممكن جداً يكون شغفك فى المجال اللى بتدرسه حالياً و ساعتها فكر فى السؤال اللى بعده وهو إزاى أبقى مختلف عن كل اللى بيحبوا المجال دة ؟ 

ونسيب السؤال دة للتوبيك اللي جاي ان شاء الله :)
أحمد وائل 




Tuesday, February 11, 2014

إزاي أشتغل فى وسط الظروف الحالية؟

إزاي أشتغل فى وسط الظروف الحالية؟


أخرج بره الخلاط !!!

الخلاط ... المصطلح ده معبر جداً عن اللى بنعيشه دلوقتى، كل حاجة داخلة فى أى حاجة، التعليم فى السياسة فى الإقتصاد فى الجيش فى الشرطة، ونتيجة للجو ده بتلاقى نفسك مش عارف تعمل أي حاجة، نفسك تذاكر بس دماغك مشغولة بحبة سياسة على حبة أحوال البلد على حبة مفيش فايدة، وواحدة واحدة تحس ان حياتك كلها واقفة ومش عارف تفكر تفكير صحيح فى أى خطوة للمستقبل.

والمشكلة دى قد تبدو طبيعية جداً، ولكن فى نفس الوقت مش بالصعوبة اللى إنت متصورها، وحلها كذلك، فكل المطلوب منك إنك تخرج بره الخلاط .. بس كدة .. سهلة صح؟
طبعاً هتفكر ... سهلة إزاى .. وانت مش شايف ظروف البلد .. دة غير السياسة و مصايبها .. دة غير الشهداء والمعتقلين.

لو هنحلل الموضوع هيبقى كالتالى:
المشكلة: مش عارف أشتغل ولا أذاكر.
السبب اللى انا شايفة: ظروف البلد السياسية والإقتصادية.
السبب الحقيقي: انا اللى مش عايز أشتغل، وبستخدم الظروف كمنوم لضميري.

طيب قبل ما تبدأ الإعتراضات تعالى نعمل مع بعض الإختبار الصغير دة .. تخيل إن معايا علبة شيكولاتة طعمها راائع، سويسرية مثلاً .. و قلتلك إختار: أديك نص العلبة دلوقتى؟ .... ولا أجيبلك علبة تانية وأديهالك بعد أسبوع؟

إختار ............................................... على الأغلب إخترت نصها دلوقتى بالتأكيد :) ,, لسة هستنى أسبوع

طيب نفس السؤال، لو معايا نفس علبة الشيكولاتة و قلتلك أختار: أديك نصها بعد سنة؟ .... ولا أديهالك كلها بعد سنة و أسبوع؟

إختار .............................................. طبعاً مش فارقة، تفرق اية سنة من سنة و أسبوع، أكيد سنة و أسبوع و أخد العلبة كلها

الفكرة إن بعد سنة بالظبط هتتحط فى نفس الظروف وهتبقى فى نفس موضع الإختيار إللى انت أخترته دلوقتى، وهو إنى مش هستنى أسبوع ... إنما فى توقعك الحالى أكيد أنا بعد سنة هكون أكثر صبراً و أحلى وأجمل و أذكى و.......  
ودة تفكيرنا كلنا ... كلنا فى المستقبل هنعمل المطلوب مننا و هنبقى منتجين و مش هنأجل شغلنا، والمنوم الشهير للضمير(( هنذاكر من أول السنة)) وإلى آخره من الصفات العظيمة اللى هيا مش موجودة دلوقتى خالص.
احنا دلوقتى التعبانين و إللي بنأجل شغلنا و وإللى معندناش صبر على حاجة.

إذن السبب الحقيقي فى أى شئ بنعمله هو إحنا .. و الحاجة الوحيدة اللى لينا السيطرة المطلقة عليها هى عقولنا .. وكان فيه مثل انجليزى قوى جداً فى النقطة دى بيقول:
 it's not important what happens TO you .. what is really important is what happens IN you

أكيد سمعت كتير جداً عن ناس واجهتها ظروف قاسية فى حياتها، واتغلبت عليها و بقت ناجحة .. الناس دى مغيرتش الظروف ولا غيرت الأحداث اللى حواليها .. الناس دى غيرت من نفسها و تفكيرها تجاه أى ظرف بيقابلها.
ويوم ما تستسلم للواقع هيبقى عشان -أنت- عايز تستسلم للواقع .. فقط ولا غير.

طيب إذن ايه الحل؟ أنا لسة برضه متغيرتش (وياريت بلاش كلام تنمية بشرية) 

الحل إنك تحط لنفسك حاجتين فقط ... 1- إنك تفتح الماسورة ...2- تخلي عندك هدف يخليك تشتغل ... مش قلنا بلاش تنمية بشرية ... صبرك عليا بس.

بالنسبة للماسورة .. فدي المفتاح إللي يخليك تعمل الحاجة إللي ناوى تعملها .. في مقولة حلوة بتقول
P & P Comes from the same P
Pain and Pleasure comes from the same Pipe 
بمعنى إن الألم و السعادة بييجوا من ماسورة واحدة .. إنت لما بتشتغل بتحس بألم .. الألم دة حاجة مش حلوة .. بس لما بتعمل اللى وراك فعلا بتحس بسعادة .. فلأنك عايز السعادة بس ومش عايز الألم بتعمل اية .. بتقفل الحنفية ..
جرب مرة تفتح الحنفية و تتقبل الألم دة .. و طبعاً مش هيخليك قادر على تقبله غير حلمك و هدفك.

طيب عشان تقتنع أكتر .. فكر معايا، ماذا لو جاء رئيس جمهورية أو وزير أو حتى مدير شركة .. و قالكوا السنة دى إحنا مش عارفين بالظبط عايزين نكسب قد إية .. ولا محددين يبقى معانا كام عشان ندفع لكوا مرتباتكوا .. ولا عندنا خطة أصلاً للسنة الجديدة !!!
هل تعتقد إنك هتفضل فى الشركة دى يوم واحد؟ .. بل هل تعتقد ان الكلام دة أصلاً يصدر من واحد عاقل .. أيوة هوة بالفعل بيصدر من واحد عاقل .. منك.

الحلم والهدف مش مصطلحات حلوة بنسمعها و نعمل نفسنا مصدقينها وخلاص .. ربنا سبحانه وتعالى -ولله المثل الأعلى- حطلك هدف قدامك عشان يعينك على حياتك، وهو الجنة .. ربنا سبحانه وتعالى يستحق أن يعبد بلا جنة .. إذن إية الحكمة فى وجود الجنة كجائزة ليك على عبادته سبحانه .. لأنه خلقك كدة .. و من غير هدف هتفضل واقف فى مكانك و مش هتتحرك.
لأن ربنا سبحانه و تعالى نزلك على الأرض برسالة .. رسالة خاصة بيك إنت بس .. وكل المطلوب منك إنك تفتحها و تقراها .. و تنطلق.
و متشغلش نفسك أنا فتحت الرسالة فى الوقت المناسب ولا لأ .. لأنك هتفتحها فى الوقت الذى اختاره الله لك و هو دائماً الوقت المناسب
عليك بس إنك تسعى و تفكر وتتدور جواك على الرسالة دى .. ساعتها هيبقى لحياتك معنى .. و ساعتها هتنجح .. ودة اللى هنتكلم فية المرة الجاية ان شاء الله
إزاى ألاقي الرسالة ؟ و إزاى أعرف إن هيا دي فعلاً رسالتى وإنى ماشى صح فى طريقى؟ 
بالتوفيق للجميع و عذراً على الإطالة

أحمد وائل










Wednesday, February 5, 2014

إزاي متشتغلش فى أى شركة كبيرة 2

إزاي متشتغلش في أى شركة كبيرة !!

-2-

الإنترفيو !!



ذلك البعبع والخطوة ثقيلة الظل على كل المتقدمين .. لو دخلت أول انترفيو ليك هتتفاجئ بمجموعة من الأسئلة الصعبة والسخيفة -فى نظرك- .. و المطروحة بواسطة شخص على الأغلب لن يروق لك.

ثم تتوالى الإنترفيوهات، وهتبدأ تسأل نفسك السؤال الطبيعى: هى إية الإجابة الصحيحة على هذة الأسئلة؟
وطبعا هتجرب تسأل حد زميلك شغال فى المجال دة، و هتلاقى الإجابة المعتادة: مفيش إجابات صح وغلط لأن الإجابة بتعبر عن شخصيتك !!!!

والحقيقة إن بالطبع فية إجابات صح و إجابات غلط .. والا مكانش فية ناس بتتقبل وناس لأ .. ولكن الإختلاف بيبقى فى مفهوم الصح والغلط عندك .. فمثلا لو أنا فى نشاط طلابى و هنبدأ نعمل إنترفيوهات عشان هنبدأ كورس marketing مثلاً .. حضرتك هتيجى تقدم، وفى الإنترفيو هسألك تعرف اية عن الماركتينج؟
طبعاً انت كواحد مذاكر ونفسه ياخد الكورس هتقولى دة أنا أعرف وأعرف وأعرف .. متشكر جداً إنت rejected.
لأنى فى الحقيقة بدور على حد (ميعرفش) ، عشان أديلة الكورس وأفيده :)

وهنا هنوصل لنقطة مهمة جدااا .. الـinterviewer عايز منك اية بالظبط؟
وقبل ما نجاوب على السؤال دة تعالوا نصحح حبة مفاهيم صغيرة بعدها هتوضح الصورة :)

1- الإنترفيو مش إمتحان .. بمعنى ان مفيش طرف بيسأل فقط و التانى بيجاوب فقط ... الإنترفيو هو محادثة عادية جداً بين شخصين بيتعرفوا على بعض!!!
 إية دة يعنى ممكن أسأل أنا فى الإنترفيو؟    أنت لااااازم تسأل فى الإنترفيو!
سؤالك فى الإنترفيو كله فوائد . 1- هتكسر حاجز القلق والرهبة 2- هتعطي إنطباع إنك متجاوب وبتفكر  3- هيكسر الجو اللى الـinterviewer ممكن يكون بيحاول يسيطر عليك بيه 4- هيبان إنك عايز تتعلم فعلاً.

دة غير إن فى آخر الإنترفيو الـinterviewer نفسه هيسألك لو عايز تسأله فى حاجة .. و المعظم للأسف بيكون استوى فبيقوله شكراً ويمشى .. إنما حتى السؤال دة بيكون عايز يعرف بيه إنت اية اللى فى دماغك وناوى على اية؟

طيب أسأل عن اية يعنى؟    اسأل عن كل حاجة بس اسأل بذكاء .. يعنى متروحش تسأل، هوة شركتكوا بتعمل إية بالظبط ؟!!
هتبقى بالظبط زى الطالب اللى وقف الدكتور وهو بيشرح وقاله .. أنا مش فاهم أى حاجة !! تخيل رد الفعل :)
إنما ممكن تقول، إنتوا كاتبين على موقع الشركة انكوا شغالين فى بطاريات النيكل كادميوم مثلاً، هل عندكوا قسم للصيانة ولا تصنيع فقط؟ -مثلاً-
وطبعا السؤال لازم يكون له ما يبرره مش سؤال وخلاص.

2- فية مصطلح مشهور أوى و صح أوى أوى فى التقديم لأى شركة، وهو: Do Your Homework
ذااكر الشركة قبل ما تروحلها .. اعرف فاتحة فين و بتعمل اية و اية اهم منتجاتها و بينزلوا اعلانات الوظايف فين .. كل المعلومات دى هتفيدك جدا وانت فى أى انترفيو .. و هتوصل الفكرة اللى اتكلمنا عليها قبل كدة وهى : انك عايز تشتغل فى الشركة دى .. بس.

3- لو واخد كورس interview skills هتقابلك مشكلة صغيرة جداً .. الـinterviewer واخد عشر كورسات و دبلومتين على كام سنة خبرة :) .. يعنى بمنتهى البساطة لو قالك، عيوبك إية؟  و قولتله أنا بتعب نفسى جامد فى الشغل ... بدقق فى كل حاجة و بتعب نفسى فى التفاصيل ... الخ .. فنقول الف الف مبروك انت rejected برضه .. لأنه مش هيفهمها غير إنك بتتلاعب بالسؤال ومش عايز تبقى صريح.

4- الراجل بيبصلي بإستغراب وقرف .. ولااااا يهمك .. هتشتغل وهتبقوا أصحاب و هيبطل يبصلك بقرف .. المهم حالياً هو السؤال اللى بيسأله، لأن أحياناً الـinterviewer ممكن يلجأ لأى وسيلة لتشتيت انتباهك عشان لو بتكذب تبان.

5- حاجة قد الناس تكون عارفاها ولكن نذكر بيها .. طبيعي انك تلاقى سؤال عن اهم مميزاتك او لية أختارك إنت بالذات .. ولكن لازم تبقى عارف كويس جدا ان طبيعي برضه اول ما تقوله انا مبدع فى شغلى .. هيكون السؤال التالى مباشرة: طب ممكن تقولى على مشكلة كانت قدامك قبل كدة و طلعت فيها ابداعك؟ خليك جاهز :)

6- السرعة فى الإجابة مش فى مصلحتك على الإطلاق .. بل على العكس ممكن تأثر سلباً عليك من عدة نواحى .. ممكن تتلغبط، وممكن فجأة مخك يقف، فسرعتك تقل فيبان انك بتحاول تفكر فى الكلام قبل ما تقوله وكأنك مخبى حاجة .. دة غير ان الإنترفيو بيبقى محدد المدة فكل ما هتسرع انت فى الإجابة كل ما الinterviewer هيلاقى وقت يسألك أسئلة تانية :) .. خد وقتك وفكر قبل ما تجاوب.

7-بعد كل انترفيو -قبل ما تقوم وتمشى- دايماً اطلب يتبعتلك فيدباك feedback  .. وحاول تاخد الcontacts الخاصة بالinterviewer ودة مفيد جدا ولأسباب كتير.. اولها هتعرف لو متقبلتش المشكلة كانت فين؟ .. و دة هيديك فرصة انك تحسنها المرة الجاية .. وكمان هتبقى شخص بيحاول دايماً يطور نفسه.

طيب يبقى نرجع للسؤال الأساسي: الـ interviewer بيدور على إيه بالظبط ؟؟؟ 
ببساطة بيدور على مدى ملائمة حضرتك لحاجتين : 1- الوظيفة اللى حضرتك مقدم فيها    2- سياسة الشركة و رؤيتها policy & vision
عشان كدة Doing your homework من أهم الحاجات اللى ممكن تعملها قبل ما تروح لأى شركة و للأسف قليل اللى بيهتم بيها.

أخيراً .. الإنترفيو حاجة ممتعة جداً .. بتخليك تشوف نفسك من جوانب يمكن تكون مبصتلهاش قبل كدة .. و بتديك فرصة رااائعة تتعرف بيها على أهم مميزات و عيوبك و نقاط قوتك و نقاط ضعفك .. لا وكل دة ممكن تاخد وظيفة هدية فى الآخر :)
ولو لسة مش مصدق إن الإنترفيو حاجة سهلة .. شوف اللينك دة و هتتبسط أوووي :)

https://www.youtube.com/watch?v=FWnVNJCQZIg


بالتوفيق للجميع ...

أحمد وائل




Monday, February 3, 2014

إزاى متشتغلش فى أي شركة كبيرة ؟!!

ازاى متشتغلش فى أى شركة كبيرة ولا يجيلك اى منحة

-1-

طبعا كلنا عارفين ان الشغل سهل جدا .. وممكن بسهولة تشتغل فى الشركة اللى نفسك فيها وتاخد المرتب اللى يعجبك عشان كدة التوبيك دة ملهوش اى لازمة، بس ادينا بنتكلم :)

فى البداية كدة لازم نتفق على حبة مبادئ :
1- لو انت كويس جدا فى مجالك فممكن نقولك مبروك، انت واحد من مليون شخص كويسين جداً .. فى مجالك برضه.
2- أى شركة (كبيرة) مش هتهتم الا باللى عندك فعلاً، ففكك من انك تحور فى السي في او تزود مهارات مش فيك.
3- انسى خاااالص الفكرة العظيمة اللى بتقول ان محدش بيشتغل من غير واسطة .. لو هنقول الحقيقة هنقول ان محدش بيشتغل فى أعلى الأماكن بواسطة، لان دة فى الأول وفى الأخر هيأثر سلباً على أى شركة و مش هيبقى فى مصلحتها.

بعد ما اتفقنا، عايزين نبدأ نعرف اصلا الشركات بتفكر ازاى
بكل بساطة الشركة بتبقى محتاجة تشغل وظيفتين عندها .. فبتعمل اعلان على موقعها على النت أو على مواقع التوظيف او على لينكدان او فيسبوك .. فنظرا لثقافة القطيع المتبعة فى مصر بيجيلها على الأقل -بدون مبالغة- ألفين سي في كل وظيفة
وعملية اقتناص الوظيفة بتبدأ من هنا
وهنتكلم بإذن الله عن كل نقطة فى موضوع بالتفصيل .. ولكن هيبقى بأسلوب تانى غير اللى ممكن تشوفوه لو خدت اى كورسات job hunting او cv writing 
الموضوع هيبقى تغيير مبادئ عايشين بيها اكتر منه حاجات تتحفظ عشان ترصها

اولا: السي في

فكر و حط نفسك مكان الشخص المسكين اللى هيقرا السي في بتاع حضرتك وسط ألفين آخرين، و مطلوب منه يختار الشخص المناسب ..
 و معلومة بقى : أغلب الشركات مبتديش الموظفين وقت أصلا لقراءة السيفيهات داخل اوقات العمل وانما بياخدوها معاهم البيت!!!
 -حقيقة-
فعايزك تتخيل شعور شخص راجع بيته بدل ما يريح ولا يقعد مع اهله هيقعد يقرأ سيفيهات .. لذلك فمتوسط قراءته لأى سي في هو ثلاثون ثانية، بعدها السي في بيتركن بلا رجعة.

إذن السؤال البديهي هنا .. هو بيدور على اية بالظبط .. بسسسس امسك فى دي
مشكلتنا ان أغلبنا ماشيين بمبدأ ارمى السي في فى كل حتة و يا صابت يا خابت .. ودة بيتعارض تماما مع اللى عايزاه أى شركة .. كل شركة بتبقى عايزة اللى فعلا نفسه يشتغل فيها -هيا وبس- .. و اول ما بتلاقيه، حتى لو مش هوة أحسن سي في موجود الا انها بتختاره لأنه بيحمل ميزة مش موجوددة فى الباقى وهى الـ passion .
ودة موضوع كبيير ان شاء الله هنتكلم عنه ..

1- فأول حاجة و أهم حاجة، إني أكون مذاكر الشركة اللى بقدم فيها، و مش بس كدة انما مذاكر الوظيفة اللى انا مقدم فيها كمان ..  و لازم دة يبقى واضح فى السي في .. وهنا ييجى دور اول سطرين بعد معلوماتك الشخصية (لازم يحددوا انت بتدور على اية بالظبط ومدى ملائمته للوظيفة المتاحة)
ولاااازم يتغير من شركة للتانية و من وظيفة للتانية .. معلش هنتعب حضرتك .. انما لو عندك حاجة تانية ممكن تعملها اهم من مستقبلك اتفضل :)

2- أحط صورة ولا لأ؟ لأ متحطش .. الا لو مقدم فى الـUSA ولو عملت الحركة دى فى بريطانيا بيعتبروها قلة أدب لأنهم بيخافوا من التمييز العنصرى.

3- بلاش الله يكرمك فكرة أملأ السي في دي .. لأن اللى هيقراها معندوش وقت يعرف اتخرجت من ثانوى بمجموع كام لو انت مهندس ولا هتفرق معاه انك واخد كورس ماتلاب لو انت مقدم على وظيفة ديزاينر،وأكيد طبعا معندوش وقت يقرأ سي في تلات صفحات .. فخليك محدد و professional .
وفية طريقة لطيفة تعرف بيها هتتقبل ولا لأ .. اسمها طريقة الورقة المطوية
اطوى ورقة السي في ثلاث مرات كما بالشكل .. افتحها واقرأ اول ثلث .. لو لقيته يقنع اللى هيقراه انك تستحق الوظيفة .. مبروك



4- مش لازم تتوسع اوى فى كتابة معلوماتك الشخصية .. فأحيانا تسبب التمييز .. وفعموما فى مجال العمل لا يحبذ التحدث فى أربعة مواضيع ... الدين - السياسة - تطلعاتك المهنية - مشاكلك الأسرية.

5- "أستطيع العمل فى فريق" .. "أستطيع العمل تحت ضغط" .. و غيرها من العبارات اللى اكيد طالب ثانوى ممكن يكتبها بكل أريحية لا تمثل اى شئ يذكر بالنسبة للى بيقرأ السي في لأنها هتبان فى الإنترفيو.

6- الأخطاء الإملائية .. الأخطاء الإملائية .. الأخطاء الإملائية ... بالفعل من الاشياء القاتلة التى يتم بسببها رفض السي في بالكامل .. لأن ببساطة صاحبها غير مهتم و مش فاضى يراجع بياناته .. لذلك تحقق من كل كلمة و اجعل الأستاذ GOOGLE صديقك.

7-  Write a COVER LETTER
وال cover letter هو مفتاح وصولك لأى شركة كبيرة .. فمن بين ألفين سي في مثلا ممكن تلاقى تلاتة مقدمين cover letter ومش محتاجين اقولكم مين اللى بيحظوا بأكبر قدر من الإهتمام.
لمعلومات اكتر عن الـcover letter و طريقة كتابتة يرجى زيارة الروابط دى:

https://www.youtube.com/watch?v=xX5nbk8SgrQ
ثم
https://www.youtube.com/watch?v=u0suKZ-oU8s

ملحوظة أخيرة: ممكن يتبادر الى الأذهان سؤال .. و ماذا لو انا معنديش حاجة اكتبها فى السي في؟!!
ولاااا اى مشكلة .. اتحرك .. اعرف انت عايز اية وخد كورسات واتعلم حتى لو self learning .. دة فى الحقيقة بتبقى حاجة مميزة جدا لو كاتب فى السي في انك اتعلمت حاجة self leaning .. و اللى ناوى بإذن الله ممكن يبعتلى هو عايز يتعلم اية و فى ظرف أسبوع بالكتير بإذن الله هيلاقى كل الماتيريال عنده .. وأحيانا من اكبر الجامعات كمان.

انتظروا باقى الأجزاء بإذن الله، ودعواتكم :D

أحمد وائل