نصائح وانت بتتعلم أونلاين

نصائح وانت بتتعلم أونلاين 

الفترة الأخيرة زادت نسبة الكلام على الـOnline courses والتعليم المفتوح بكل صورة، دى حاجة رائعة.

ولكن معظم اللى بدأوا يتعلموا اونلاين -ان مكانش كلهم- واجهتهم نفس المشكلة: بنشترك فى كورسات كتير جداً و مش بنكمل أى واحد فيهم!!

أو

بنشترك فى الكورس ونبدأ فى اول محاضرة .. ومنفتحوش تانى!!

لية الموضوع دة بقى  
الحقيقة لسببين رئيسيين:
1- تعدد المصادر اللى ممكن تاخد منها المعلومة، فبالتالى بتقع فى حيرة أبدأ فى دة ولا دة؟
2- (وهى الأهم) قلة خبرة الشخص لأن كلنا غالباً بتبقى أول مرة نتعامل مع النوع دة من (الحرية) فى اختيار الحاجة اللى عايز تتعلمها، بعد ما كان النظام السائد هو (اللى يتحط قدامك تحفظة) 

وعشان نحط حل جذرى و سريع للنقطتين دول، جرب تعمل الآتى:
1- لو اول مرة تماماً تبدأ فى كورس أونلاين .. ابدأ بكورس صغير لا يتعدى الساعة او الساعة ونصف فى مجملة
هتلاقى النوعية دى من الكورسات على مواقع زى Udemy
الهدف: هتخلص الكورس بسرعة وختحس انك حققت حاجة، والإحساس دة كورس فى الاول
2- بعد اول كورس، ابعد تماااااااماً عن الكورسات الصغيرة و حتى الكورسات الكبيرة اللى انت مش محتاجها دلوقتى .. هتلاقى عندك option انك تحفظ الكورسات عندك فى الـWish list مثلاً
الهدف: هتلاقى كورسات كتير جدا فى مجالات كتير (هيتهيألك انك لازم تاخدها)
3- ابدأ فى كورس كبير ومهم فى مجالك و يفضل لو بشهادة .. و قبل ما تبدأه اسأل نفسك: لية هبدأ فى الكورس دة؟ و هطلع منة بإية؟
الهدف: خيبقى وراك Task واحدة .. ومطلوب منك شئ واحد .. مش مليون task ومليون كورس .. وفى الآخر هتخلصة وهتحس فعلا بتقدم .. و ساعتها تكتبه كمان فى الـCV مستريح