Tuesday, August 12, 2014

إزاي أعرف شغفي؟! -4-

الحلقة الرابعة من سلسلة " إزاى اعرف شغفي؟!" 

من بعد الحلقة اللى فاتت و قصدت -عمداً- انى أستنى فترة كبيرة نسبياً قبل ما انزل الحلقة الرابعة .. و بالفعل من بعدها جت رسايل كتير بتسأل فى موضوع الشغف، و الرد كان .. انت وصلت لفين؟ :D

لأن واحدة من المشاكل اللى غالباً كلنا بنقع فيها، إنك عايز كل حاجة تبقى متاحة ليك وبعدها تبدأ تتحرك .. وفى الغالب مش بتتحرك .. لأن ببساطة انت خلاص اتطمنت !! :D :D
الإطمئنان إحساس ميساعدكش انك تفكر و تتعب و تبدع فى الوصول لطريقك .. الإطمئنان أكثر مدعاه انك تستريح و ... "تطمن" .. ماهو اصل كل حاجة تحت ايدك يوم ما تحتاجها هتلاقيها و الدنيا ماشية تمام، هتتعب نفسك لية؟!!
الإطمئنان شعور غير صحى بالمرة. :D

بس خليني أقول إن كان فيه سؤال بيتكرر كتير جداً فى الرسايل .. و هو دة موضوع كلامنا النهاردة ... السؤال هوة:

أعمل اية لو أنا عندى مهارات كتير، و قادر أشتغل فى أكتر من مجال وأحبه؟!!!
والرد على السؤال دة هيوضحلنا نقطة جديدة و trick جديدة فى الوصول لشغفك .. فلو عندك نفس المشكلة، ركز أوى فى الكام سطر الجايين دول .. :D

- التفكير فى الشغف بيبقى بطريقتين .. الأولى: من الحاضر للمستقبل .. و الثانية: من المستقبل للحاضر .. يعنى ممكن نسمى واحدة forward و التانية backward 

- عشان أفكر من الحاضر للمستقبل فأنا ببدأ أفكر: أنا بحب ايه حالياً؟ .. أنا شاطر فى اية؟ باختصار: مجموعة الأسئلة الثانية فى الحلقة اللى فاتت. (شوفها لو مش فاكر) :D

- أول مشكلة بتقابلك إنك (رغم قدراتك الحالية) مش حاسس انك ممكن تعمل حاجة أصلاً .. و دة صحيح تماماً .. لأنك ساعتها مش بتبقى حاطط فى حسابك القدرات و المعرفة والمهارات اللى هتكتسبها وانت فى طريقك.
ولذلك مشكلة التفكير دة انك بتبقى مشتت .. والسؤال الأقوى اللى بيبقى فى ذهنك .. أبدأ منين؟! :/
ولذلك برضه، الأصح انك تفكر بالتفكير التانى (backward) أولاً 

- التفكير الثانى إنك تبدأ تفكر: أنا نفسى بعد عشرين سنة أكون عملت اية؟ نفسى بعد ما أموت أكون قدمت اية للدنيا؟ باختصار: مجموعة الأسئلة الثالثة فى الحلقة اللى فاتت :D

- وأفضل طريقة عشان توصل لنتيجة صح وأدق .. إنك تفكر التفكير الثانى أولاً ثم بعد كدة الأول .. يعنى تبدأ من المستقبل و على أساسه تبدأ تفكر طيب دلوقتى بقى .. إية من قدراتى دلوقتى يوصلنى للى انا عايزة ؟ .. وممكن أبدأ بإية يحققلى هدفى فى النهاية؟
دة غير انه بيبقى مؤشر كبير لإنت فعلاً حابب اية؟ :D :D 

- طيب بالنسبة للحاجات الكتير اللى بعرف أعملها؟ ... لو فكرت هتلاقى ان كل حاجة بتعرف تعملها، فى الأصل هيا مجموعة من المواهب والمهارات اللى ممكن تكون مخلوق بيها أو اتطورت مع الزمن .. إذن الحل انك تفصص كل حاجة بتعرف تعملها لمجموعة من المهارات الأساسية .. خلينا ناخد مثال أوضح:

لو أنا فى ثانوى .. ولقيت نفسى بعرف أحلل و دماغى تحليلية .. هبقى غالباً شاطر فى الرياضة والفيزياء و حسابات الكيمياء .... ولكنى حتى الآن مثلاً خبراتى لا تتضمن مجال ال(محاسبة) .. لأنى ببساطة لسة مسمعتش بيه :D
وكذلك الحال بالنسبة لبعد كدة .. اعرف انت شاطر (إزاى) مش انت شاطر (فى اية) .. لأن مستوى معرفتك دلوقتى هتيختلف تماماً عن مستوى معرفتك بعدين .. ودة اللى هيضمنلك انك تفضل فى تطور مستمر فى حياتك.

لأن عشان تشوف مساحة أكبر من طريقك .... لازم تقوم من على الكرسى وتبدأ تمشى. :D

بالتوفيق ياشباب ^_^

اللى عايز يسأل على اى حاجة .. دة أكونت الفيسبوك . :D :D
https://www.facebook.com/AhmedWaelSaber



17 comments:

  1. موضوع اكثر من رائع

    ReplyDelete
  2. ربنا يخليك يا محمود ... لو عندك أى سؤال ابعته عشان يفيد الناس فى الحلقات الجاية إن شاء الله .. عشان كل جزء يبقى موجه لشريحة معينة بتقابلهم نفس المشاكل :D
    وربنا معاك :D

    ReplyDelete
  3. سؤال لو العمل الي بشتغلة مش بتحبة بس ممكن نتيجتة بتحبها تستمر فية؟
    مثال انت طبيب مش بتحب مهنه الطب بس روحت العيادة بالرغم من وجود أطباء كتير في نفس عملك الا ان المريض عاوزك انت تحديدًا وفضل مستنيك .. انت منبهر بالتيجة او دا الشئ الي منتظرة بس مش بتحب المهنة ؟دا غير انانت ليك رؤية مختلفة نفسك تتطبقها بس لا تتناسب مع المجتمع والدولة وما شابه ماذا تفعل :))؟

    ReplyDelete
  4. ملحوظة الرؤية الي تتمني تطبيقها في نفس مجال عملك ..

    ReplyDelete
  5. لو حد شغال دكتور وربنا رزقه ان المرضى بيحبوه أو هو عارف يتعامل معاهم فدى من المواهب اللى ربنا أنعم عليه بيها زى ما اتكلمنا فوق .. انما لو انت ليك رؤية مختلفة .. يبقى النتيجة اللى انت فرحان بيها (كدكتور) ممكن تبقى أضعافها لو اشتغلت فى المجال التانى دة .. و دة طبعاً بيتوقف على اية هو المجال التانى و مدى توافقه او تعارضه مع الب .. أصل للأسف الموضوع صعب يبقى غير محدد أوى كدة

    ReplyDelete
  6. طب لو ان انت اصلاا مش قادر لحد دلوقتى تحدد انت شاطر فى ايه تعمل ايه ؟ اناا مثلاا حاليا فى تالته هندسه بعد ما دخلت الكليه حسيت بانى مش لاقيه نفسى فيهاا برغم انى دخلت القسم اللى كنت عيزاه من قبل ما ادخل الكليه وكنت فاكره نفسى هبقى متميزه فيه بس اما دخلته حسيتت انى حملت نفسى فوق طاقتها وانى مش اده ولا لاقيه نفسى فيه ولماا فكرت فى التحويل معرفتش بردو الاقى اختيارت احول ليهاا لانى مش عارفه انا ممكن االقى نفسى فى ايه.... !

    ReplyDelete
    Replies
    1. فيه فرق كبير بين انك لقيتي القسم و علومه غير مانتى متخيلة .. و بين انك لقيتيه صعب ومش بتجيبي فيه تقدير
      طبيعي جداً كل حاجة هنقابلها فى حياتنا هتحتاج مننا وقت ومجهود ... كبير
      فلازم قبل ما تبتدى رحلتك تبقى عارفة انك لازم تتعبى لانك لو معندكيش استعداد تتعبى وجامد كمان فى سبيل نجاحك مش هتنجحى

      معلش لو كلامى تقيل شوية بس صدقيني هيا دى الحقيقة .. اننا بس بندور على المجال اللى ""نتعب"" فيه واحنا حابينه .. ودى برضه مش بتتحدد من مجرد الدراسة فى الجامعة لأن احيان كتير بتبقى المناهج عقيمة ... فركزى أكتر على العلم نفسه مش طريقة تقديمه

      أخيرا بقى اعتقد انك مقرأتيش بقية المقالات رقم 1 و 2 و 3 .. لو رجعتيلهم هتلاقى بعض المساعدة فى افكارك و اجابة على اسئلتك
      ولو فيه أى حاجة تانى اسأليني

      ربنا يوفقك

      Delete
    2. تماام قريت اللى فات وهقراهم تانى بردو لانهم يستحقوا القرايه اكتر من مره :) بس اناا لقيت المواد غير ما كنت متوقعه واللى تعبنى بجد انى حسه انى بتعب نفسى دراسيا على الفاضى لانى اكتشفت ان مش ده اللى انا كنت عايزاه فازاى بقاا اتغلب على الموضوع ده فى الوقت الحالى هوه الانسان ممكن يحب حاجه مش قادر يحبهاا بالتحدى ؟ ومن كلام التنميه البشريه اللى قريته ان قدرات الانسان لا حدود لهاا والكلام ده بيريح اوىب س اما بفكر فيه بحس لاا انا شايفه قدرات الناس اللى حوليا ومش حسه انى عندى نفس قدرتهم يمكن عندى فى مجال تانى اكيد بس مش اللى انا فيه فناا كده تفكيرى صح ولا لا راى حضرتك ؟

      Delete
    3. على المستوى الشخصى أنا مش بحب الكلام المرسل اللى ميوصلش لحاجة .. يعنى مش هستفيد لما يقولى قدراتك لا محدودة إلا لما يقولى ازاى استفيد بالقدرات دى و ازاى استخدمها؟
      انتى بتقولى انك فى تالتة كلية .. يعنى خلاص هانت .. شدى على نفسك و خدى شهادتك و استغلى الوقت دة برضه انك تبدأى تفكرى على الأسس اللى قرأتيها بالذات بالطريقتبن الموجودين هنا انك تعرفى ناوية تشتغلى فى مجال اية بعد التخرج
      و دة هيتطلب منك دراسة بعد التخرج طبعا
      ومفيش أى داعى للعجلة بس فى نفس الوقت لازم المضوع يشغل بالك 24 ساعة
      ربنا معاكى

      Delete
  7. هوه انا قريتهم والكلام بجد اثر فياا جدااا بس الفكره ازاى الواحد يقدر يحب حاجه مش قادر يحبهاا ويثبت نفسه فيها بالعافيه ! فى وقت لازم اتأقلم فيه على الاقل عشان انجح فى السنتين اللى فاضلين بالنسبالى اهوه ده ممكن يحصل لو الانسان تحدى نفسه ؟ انا مثلا باخد كورس تنفيذى بدأته من الاجازه كخطوه عشان احاول احبب نفسى فى المجال بس كل مره بحضر بحس انى بكره المجال اكتر لانى مش لاقيه نفسى فيه وده اللى المفروض هشتغله بعد م اتخرج فحسه انى بتعب نفسى على الفاضى ..بس سؤالى الاخير معلش اللى سألته ممكن اقدر احبب نفسى فى مجال بالتحدى ؟ وعايزه اعرف قريت كتير فى مجال التنميه البشريه ان قدرات الانسان لا حدود لها والكلام ده فى الوقت اللى المفروض بردو كل واحد يعترف بقدراته عشان ميتصدمش لما يدخل مجال مش مناسبه ايه الصح فى راى حضرتك واسفه انى طولت وبردو هرجع اقرا المقالات تانى لانى بجد تستحق القرايه اكتر من مره وشكرااا :] ..!

    ReplyDelete
    Replies
    1. هتلاقى الإجبة فى الكومنت اللى فوق .. بس لية عملتى كومنتين بنفس المعنى :D

      Delete
    2. تماام :) اسفه هوه اول كومنت لما كتبته ظهرلى انه موصلش فاضطريت اكتبه تانى بنفس المعنى بس المهم انه وصل وشكراا جداا على رد حضرتك واكيد هاخد بالنصيحه ان شاء الله :]

      Delete
    3. ولا يهمك .. ربنا يوفقك

      Delete
  8. انا زى ما حضرتك مدى مثال على القدرة على التحليل وكنت بالفعل شاطرة فى الرياضيات و الفيزياء وكنت بحب معادلات الكيمياء بس للاسف لما دخلت تجارة كانت صدمة ليا ومكنتش حابة الكلية وكنت بجيب اه تقدير ف المحاسبة والاحصاء بس بسقط او بمعنى تانى بشيل المواد النظرية زى السياسة والادارة والاقتصاد النظرى
    واتخصصت فى قسم احصاء وجبت فيه تقدير جيد جدا فى السنتين بتوع التخصص ولكن فى المجال العملى انا ماحبيتش شغل المحاسبة ابدا انا اشتغلت حوالى 4سنين محاسبة ومحبتهوش شغل روتينى وممل وانا بحب التغيير والابداع والتفكير الشغل اللى كل يوم يزودلى و يغذى مخى ويشغله ويستفذه للتفكير
    انا سيبت الشغل للسبب دة ولاسباب تانية كتير بس دة كان الشرارة
    المهم انى دلوقتى انا مش عارفة انا عاوزة ايه ولا بحب ايه ولا قادرة اعرف شغفى وبجد انا لو ما عرفتوش هموت لانى فى حالة ملل من الحياة كلها ومش لاقيالها قيمة ولا لوجودى فيها قيمة
    ارجو منك المساعدة او تدلنى على الطريق او طريق للبحث عن ذاتى وعن شغفى
    وجزاك الله خير بجد على كل منشوراتك على الفيس كمان ويجعلك بها صلاح فى حياتك واخرتك

    ReplyDelete
    Replies
    1. رغم ان ردي متأخر كتير جداً إلا انى مكنش ينفع اشوف سؤال ومردش
      أتمنى يكون الوضع اتغير معاكي دلوقتى ولو لسه ابعتيلي رسالة باللى عملتيه من ساعتها و خلينا نتكلم فيه

      Delete
  9. ممكن لينك للحلقة التالتة لو سمحت

    ReplyDelete
    Replies
    1. اتفضلي:
      http://awaelsaber.blogspot.com.eg/2014/06/3.html

      سؤال: هل فرقت معاكي؟

      Delete