Full width home advertisement

Update_your_free_e_book

Post Page Advertisement [Top]

إزاي أشتغل فى الظروف الحالية ؟!!

-2-

الـ PASSION :

لو جيت سألتك: هتشتغل إية بعد ما تتخرج؟
ممكن تستغرب وتقول: طبعاً هشتغل فى مجالى، وممكن تزود كلمة -لو لقيت شغل فيه- 
إنما لو سألتك: لية عايز تشتغل فى مجالك لما تتخرج؟
فممكن ساعتها تقول: 
عشان أنا خريج الكلية الفلانية هشتغل في إية يعنى؟ .. أو:  عشان أنا دراستى كانت فى مجال كذا ودة اللى بفهم فيه .. أو: عشان بقالي خمس أو ست سنين بدرس فى المجال دة فأكيد مش بعد دة كله هسيبه واشتغل في أي حتة تاني.

كل الإجابات السابقة تعرف بإسم: الصح بتاع المجتمع!
بمعنى ان : دة اللي إنت شايف الناس بتعمله قدامك .. دة اللي إتقالك عليه إنه صح و رائع كمان - لو قدرت تشتغل فى مجالك - .. لا و كمان دة دليل على إنك كويس يعني مش وحش.

ولكن للأسف كل الإجابات دى برضه بتأهلك بامتياز إنك تقضى ما بقى من عمرك فى إرهاق وتعب و -ضيق-  فقط عشان تقدر تواصل دورة حياتك، و دة لسبب بسيط جداً
كل الحاجت دي .. مش إنت .. 
كل الحاجات دي حاجات إتقالك عليها كويسة، لأننا اتربينا فى مجتمع بيقول إن دائماً اختياراتنا هيا الغلط وهناك دائماً من يعرف الصواب وعلينا أن نسير وراءه بلا تفكير .. دخلت هندسة لية: عشان جبت مجموع كبير فى ثانوية عامة 
طب إنت جبت مجموع كبير لية؟ عشان أدخل هندسة !!
أيوة يعني إنت عايز تدخل هندسة لية؟ عشان أنا أعرف فلان مهندس و شغال فى شركة كبيرة و معاه عربية BMW -مثلاً يعنى :) -؟ 
أيوة، هو بقى كدة، إنما إنت مش شرط خالص تكون كدة، لأن ببساطة إنت دورت على -غيرك- كان كويس فى اية و مشيت وراه
ودة اللي دايماً بنعمله -بنشوف فلان- إزاى ناجح و رائع ومعاه فلوس و ساعتها بنقول لنفسنا الجملة المشهورة - أنا عايز أبقى زيه-
وتبتدى تشوف هوة عمل إية عشان تعمل زيه.
ولو فكرنا شوية فى الجملة دى هنلاقيها غاية فى الخطأ .. عمرك سمعت عن إتنين مشهورين ليهم نفس قصة النجاح؟
طب عمرك سمعت عن واحد مشهور فى حاجة -أحمد زويل مثلاً- وقالك أنا مكنتش بطيق الفيزياء فى الجامعة بس اتخرجت واشتغلت لحد ما بقيت كدة؟
الإجابة هي: لأ، طبعاً

أمال ايه الكلمة المشهورة أووووي اللي كل الناس الناجحين بيقولوها؟ اية القاسم المشترك بين كل الناس دي؟
كنت بحب الفيزياء وانا صغير وكنت كاتب على باب الاوضة الدكتور أحمد ... أحمد زويل (نوبل فى الفيزياء)
كنت بعشق كرة السلة ولما اترفضت من فرق المدرسة بكيت... مايكل جوردون (بطل NBA ست مرات و اغلى لاعب فى NBA )
كان عندي شغف رهيب بالإلكترونيات منذ صغري وقدمت ورقة بأفكارى فى شركة أتاري ATARI مما تسبب فى جعلي أعمل بعدها كمصمم ألعاب ... ستيف جوبز (مؤسس APPLE و PIXAR)

باالظبط .. الشغف PASSION .. والشغف هو الحاجة اللى تخليك شغال 18 ساعة فى اليوم فى الحاجة اللى انت بتحبها بدون الإحساس بال-ضيق-



و اليوم اللى هتبدأ تدور بيه على شغفك، و تبدأ تفكر -إنت- فعلا بتحب اية، و اية أكتر حاجة شايف نفسك فيها -مهما كانت- .. هو اليوم اللى حياتك هتاخد فيه منحنى آخر تماماً، و هتبدأ فعلاً فى قراءه و تنفيذ رسالتك فى الحياة، لأن الله لم يخلق ذلك الشغف والحب فيك عبثاً لتتجاهله و تروح تشتغل فى حتة تانية.
مش معنى كدة ان الدنيا هتبقى وردى و سهلة اول ما تلاقى مجالك بالعكس هتبقى أصعب بمراحل، الفرق الوحيد: انك مش هتفكر امتى الأجازة ولا هتفكر امتى الشغل يخلص، لأنك بالفعل بتحقق ذاتك أثناء الشغل.
ومش معنى كدة برضه انك لازم تغير مجالك، ممكن جداً يكون شغفك فى المجال اللى بتدرسه حالياً و ساعتها فكر فى السؤال اللى بعده وهو إزاى أبقى مختلف عن كل اللى بيحبوا المجال دة ؟ 

ونسيب السؤال دة للتوبيك اللي جاي ان شاء الله :)
أحمد وائل 




12 comments:

  1. رائعة جدا واستفدت فعلا .. فيه استفسارات عايزة اعرفها ومش عارفة اتواصل مع حضرتك ؟؟

    ReplyDelete
    Replies
    1. جزاك الله خير .. انا تحت أمرك، دة لينك الFB
      https://www.facebook.com/AhmedWaelSaber

      Delete
  2. كلام جميل جدا وافادني كتير

    ReplyDelete
    Replies
    1. الحمد لله رب العالمين .. بس أهم حاجة تبدأى تطبقى فعلاً .. وعلى مدار حلقات السلسلة على الفيسبوك ان شاء الله هيبقى فيه اختبارات كمان.
      بالتوفيق .. :)

      Delete
  3. كلام جميل جداااا


    ةنتمني الاستمرار

    ReplyDelete
  4. أنا بعشق التصوير جدا بس مش شايفه انه له مجال شغل بالنسبه للبنات
    وكمان ظروف لبسى انى بلبس اسدال مش سهل استغل ف اى مكان

    ReplyDelete
    Replies
    1. طيب كويس جداً .. مفيش أى مشكلة فى كلامك

      Delete
  5. Replies
    1. دى شهادة كبيرة عليا يا كبيرنا :D ;)

      Delete
  6. انا المشكلة دى تقريبا مدمرانى ومش عارفه ابدا منين

    ReplyDelete
  7. هيا فعلاً مشكلة كبيرة جداً وبتؤرق ناس كتير .. بس حضرتك ممكن تشوفى السلسلة دى وحاولى تتابعى معاها اول بأول بدون قراءة كل المواضيع مرة واحدة.. وبإذن الله هتلاقى نتيجة فعالة
    لينك السلسلة:
    https://www.facebook.com/AhmedWaelSaber/posts/10152193859840098

    ReplyDelete

Bottom Ad [Post Page]

| Designed by Colorlib