Full width home advertisement

Update_your_free_e_book

Post Page Advertisement [Top]

ازاى متشتغلش فى أى شركة كبيرة ولا يجيلك اى منحة

-1-

طبعا كلنا عارفين ان الشغل سهل جدا .. وممكن بسهولة تشتغل فى الشركة اللى نفسك فيها وتاخد المرتب اللى يعجبك عشان كدة التوبيك دة ملهوش اى لازمة، بس ادينا بنتكلم :)

فى البداية كدة لازم نتفق على حبة مبادئ :
1- لو انت كويس جدا فى مجالك فممكن نقولك مبروك، انت واحد من مليون شخص كويسين جداً .. فى مجالك برضه.
2- أى شركة (كبيرة) مش هتهتم الا باللى عندك فعلاً، ففكك من انك تحور فى السي في او تزود مهارات مش فيك.
3- انسى خاااالص الفكرة العظيمة اللى بتقول ان محدش بيشتغل من غير واسطة .. لو هنقول الحقيقة هنقول ان محدش بيشتغل فى أعلى الأماكن بواسطة، لان دة فى الأول وفى الأخر هيأثر سلباً على أى شركة و مش هيبقى فى مصلحتها.

بعد ما اتفقنا، عايزين نبدأ نعرف اصلا الشركات بتفكر ازاى
بكل بساطة الشركة بتبقى محتاجة تشغل وظيفتين عندها .. فبتعمل اعلان على موقعها على النت أو على مواقع التوظيف او على لينكدان او فيسبوك .. فنظرا لثقافة القطيع المتبعة فى مصر بيجيلها على الأقل -بدون مبالغة- ألفين سي في كل وظيفة
وعملية اقتناص الوظيفة بتبدأ من هنا
وهنتكلم بإذن الله عن كل نقطة فى موضوع بالتفصيل .. ولكن هيبقى بأسلوب تانى غير اللى ممكن تشوفوه لو خدت اى كورسات job hunting او cv writing 
الموضوع هيبقى تغيير مبادئ عايشين بيها اكتر منه حاجات تتحفظ عشان ترصها

اولا: السي في

فكر و حط نفسك مكان الشخص المسكين اللى هيقرا السي في بتاع حضرتك وسط ألفين آخرين، و مطلوب منه يختار الشخص المناسب ..
 و معلومة بقى : أغلب الشركات مبتديش الموظفين وقت أصلا لقراءة السيفيهات داخل اوقات العمل وانما بياخدوها معاهم البيت!!!
 -حقيقة-
فعايزك تتخيل شعور شخص راجع بيته بدل ما يريح ولا يقعد مع اهله هيقعد يقرأ سيفيهات .. لذلك فمتوسط قراءته لأى سي في هو ثلاثون ثانية، بعدها السي في بيتركن بلا رجعة.

إذن السؤال البديهي هنا .. هو بيدور على اية بالظبط .. بسسسس امسك فى دي
مشكلتنا ان أغلبنا ماشيين بمبدأ ارمى السي في فى كل حتة و يا صابت يا خابت .. ودة بيتعارض تماما مع اللى عايزاه أى شركة .. كل شركة بتبقى عايزة اللى فعلا نفسه يشتغل فيها -هيا وبس- .. و اول ما بتلاقيه، حتى لو مش هوة أحسن سي في موجود الا انها بتختاره لأنه بيحمل ميزة مش موجوددة فى الباقى وهى الـ passion .
ودة موضوع كبيير ان شاء الله هنتكلم عنه ..

1- فأول حاجة و أهم حاجة، إني أكون مذاكر الشركة اللى بقدم فيها، و مش بس كدة انما مذاكر الوظيفة اللى انا مقدم فيها كمان ..  و لازم دة يبقى واضح فى السي في .. وهنا ييجى دور اول سطرين بعد معلوماتك الشخصية (لازم يحددوا انت بتدور على اية بالظبط ومدى ملائمته للوظيفة المتاحة)
ولاااازم يتغير من شركة للتانية و من وظيفة للتانية .. معلش هنتعب حضرتك .. انما لو عندك حاجة تانية ممكن تعملها اهم من مستقبلك اتفضل :)

2- أحط صورة ولا لأ؟ لأ متحطش .. الا لو مقدم فى الـUSA ولو عملت الحركة دى فى بريطانيا بيعتبروها قلة أدب لأنهم بيخافوا من التمييز العنصرى.

3- بلاش الله يكرمك فكرة أملأ السي في دي .. لأن اللى هيقراها معندوش وقت يعرف اتخرجت من ثانوى بمجموع كام لو انت مهندس ولا هتفرق معاه انك واخد كورس ماتلاب لو انت مقدم على وظيفة ديزاينر،وأكيد طبعا معندوش وقت يقرأ سي في تلات صفحات .. فخليك محدد و professional .
وفية طريقة لطيفة تعرف بيها هتتقبل ولا لأ .. اسمها طريقة الورقة المطوية
اطوى ورقة السي في ثلاث مرات كما بالشكل .. افتحها واقرأ اول ثلث .. لو لقيته يقنع اللى هيقراه انك تستحق الوظيفة .. مبروك



4- مش لازم تتوسع اوى فى كتابة معلوماتك الشخصية .. فأحيانا تسبب التمييز .. وفعموما فى مجال العمل لا يحبذ التحدث فى أربعة مواضيع ... الدين - السياسة - تطلعاتك المهنية - مشاكلك الأسرية.

5- "أستطيع العمل فى فريق" .. "أستطيع العمل تحت ضغط" .. و غيرها من العبارات اللى اكيد طالب ثانوى ممكن يكتبها بكل أريحية لا تمثل اى شئ يذكر بالنسبة للى بيقرأ السي في لأنها هتبان فى الإنترفيو.

6- الأخطاء الإملائية .. الأخطاء الإملائية .. الأخطاء الإملائية ... بالفعل من الاشياء القاتلة التى يتم بسببها رفض السي في بالكامل .. لأن ببساطة صاحبها غير مهتم و مش فاضى يراجع بياناته .. لذلك تحقق من كل كلمة و اجعل الأستاذ GOOGLE صديقك.

7-  Write a COVER LETTER
وال cover letter هو مفتاح وصولك لأى شركة كبيرة .. فمن بين ألفين سي في مثلا ممكن تلاقى تلاتة مقدمين cover letter ومش محتاجين اقولكم مين اللى بيحظوا بأكبر قدر من الإهتمام.
لمعلومات اكتر عن الـcover letter و طريقة كتابتة يرجى زيارة الروابط دى:

https://www.youtube.com/watch?v=xX5nbk8SgrQ
ثم
https://www.youtube.com/watch?v=u0suKZ-oU8s

ملحوظة أخيرة: ممكن يتبادر الى الأذهان سؤال .. و ماذا لو انا معنديش حاجة اكتبها فى السي في؟!!
ولاااا اى مشكلة .. اتحرك .. اعرف انت عايز اية وخد كورسات واتعلم حتى لو self learning .. دة فى الحقيقة بتبقى حاجة مميزة جدا لو كاتب فى السي في انك اتعلمت حاجة self leaning .. و اللى ناوى بإذن الله ممكن يبعتلى هو عايز يتعلم اية و فى ظرف أسبوع بالكتير بإذن الله هيلاقى كل الماتيريال عنده .. وأحيانا من اكبر الجامعات كمان.

انتظروا باقى الأجزاء بإذن الله، ودعواتكم :D

أحمد وائل








12 comments:

  1. على فكره جميله جدا ...

    ReplyDelete
  2. جزاك الله خيرا فعلا مفيده جدااا

    ReplyDelete
    Replies
    1. جزانا واياكم :) .. ان شاء الله القادم افضل

      Delete
  3. رائعة !!
    في انتظار الجديد وبالتوفيق دائماً إن شاء الله :)

    ReplyDelete
  4. تمام موضوع مهم جدا وجزاك الله خيرا

    ReplyDelete
    Replies
    1. جزانا واياكم يارب .. ربنا يوفقك بإذن الله :)

      Delete
  5. لما بقعد مع نفسي شوية وبفكر .. هو أنا إيه؟ وعملت إيه؟ وهكون إزاي؟ بتوه مني فعلا

    تقريبا بعرف أعمل كل حاجة ، بس مش عارف أعمل أي حاجة .. تشتت في أمور كتير جدا تحت ضغوط الحياة ، وبمبدأ أعمل أي حاجة على حسب الطلب علشان نقدر نعيش ونصرف على اللي مسئولين مننا .. لكن في الآخر لما بفكر .. هو انا محترف في إيه؟ وإيه اللي ممكن اتميز فيه؟؟ لا أجد إلا الفرااااغ العريض!!

    ReplyDelete
    Replies
    1. المشكلة دى بتواجه ناس كتير جداً .. وفعلاً بتوقع فى حيرة.
      بس حلها بسيط جداً .. متدورش انت كويس فى اية .. دور إنت (بتحب) إية
      شوف الموضوعين دول كبداية:
      http://awaelsaber.blogspot.com/2014/02/blog-post.html
      http://awaelsaber.blogspot.com/2014/02/blog-post_18.html
      وبإذن الله أنا هعمل سلسلة بوستات على الفيس تتضمن بعض الفيديوهات و الخطوات عن إزاى توصل لإنت فعلاً بتحب اية .. حضرتك ممكن تبدأ تشوفها على حسابى الشخصى على الفيسبوك
      https://www.facebook.com/AhmedWaelSaber?ref=tn_tnmn
      وربنا يوفقك بإذن الله

      Delete
  6. انا عندى مشكله الانجلش ومش عارف اركز فيه رغم انى باخد كورس ومتابع مواقع على النت

    ReplyDelete
    Replies
    1. فيه فاعدة مشهورة فى الموضوع دة بتقول
      English is Practice
      اعمل وقت كل يوم تمارس فيه الإنجليزي ولو عشر دقايق بس بتركيز .. لازم تمارس يوميا

      Delete

Bottom Ad [Post Page]

| Designed by Colorlib